Vit í Fólkaflokkinum hava eitt gott og ítøkiligt uppskot, sum skal gera tað 20% bíligari hjá fyrstuferðs-keyparum at byggja sær eini hús ella keypa sær eina íbúð.

Øll vita hvussu ómetaliga dýrt tað er blivið at byggja, ella keypa sær hús í Føroyum í dag.

Um vit vilja tað ella ikki, so ger hendan støðan longu í dag, at flestu av okkara ungu als ikki hava ráð at seta búgv í Føroyum.

Hetta mugu vit sum samfelag, gera nakað munagott við – NÚ.

Eg havi sjálvur fleiri ferðir víst á, at høvuðsorsøkin til høgu húsaprísrnar er, at útboðið av kommunalum grundstykkjum er alt ov lágt. Her mugu kommunurnar áleggjast at stykkja nógv meira út.

Eisini er danska byggikunngerðin BK 17, sum var samtykt í Føroyum, ein stór orsøk til økta byggikostnaðin, kanska við heili 700 – 800 tkr. fyri hvørt hús. Hetta er púra ørt. Hendan lógin má tí broytast, ongantíð ov skjótt.

Uppskotið frá Fólkaflokkinum og mær er í stuttum hetta:

• Fyrstuferðs-keyparar av húsum og íbúðum skulu ikki rinda MVG av íløguni.
• Um sethúsini t.d. kosta 5 mió.kr. at byggja í dag, so kann 1 mió.kr. trekkjast av sum sparast við ikki at rinda MVG.
• Fíggingin skal gerast soleiðis, at hesir fyrstuferðs-keyparar ikki fáa rentustuðul og rentustuðulin annars verður minkaður niður í onki.
• Byggisaamtyktin við BK 17 má avtakast ella gerðast munandi linari.

Lat okkum saman gera alt sum er møguligt fyri, at okkara ungu kunnu búleikast her og seta føtur undir egið borð í Føroyum, heldur enn uttanlands.

Tú kanst stuðla mær og Fólkaflokkinum við hesum til løgtingsvalið 26. mars.

Birgir Nielsen, valevni hjá Fólkaflokkinum