Skrivligur fyrispurningur til Bjørn Kalsø, landsstýrismann í mentamálum viðvíkjandi stjórasetanini í Vinnuháskúlanum.

1. Hava landsstýrismaðurin/MMR verið nøgd við avrikini hjá stjóranum farnu 8 árini?

2. Hevur stjórin í síni setanartíð avrikað leiðslusetningarnar, sum landsstýrismaðurin/MMR hava stungið í kortið?

3. Hevur stjórin í síni setanartíð hildið játtanirnar, sum Vinnuháskúlin hevur fingið tillutað frá Løgtinginum, og hava landsstýrismaðurin/MMR verið nøgd við avrikini?

4. Hevur stjórin í síni setanartíð megnað at menna maritimu útbúgvingarnar soleiðis, at tær lúka allar treytir, sum vinnan og tey lesandi seta, og sum eru í fullum samljóði við væntanirnar hjá landsstýrismanninum/MMR?

5. Hevur stjórin farnu árini megnað at varpa jaligt ljós á maritimu útbúgvingarnar og Vinnuháskúlan soleiðis, at næmingatilgongdin m.a. av hesi orsøk er meira enn tvífaldað, og hava landsstýrismaðurin/MMR verið nøgd við jaligu gongdina?

6. Var verandi stjóri innstillaður sum nummar eitt í tilmælinum frá setanarbólkinum, sum landsstýrismaðurin fekk handað í juni?

7. Var landsstýrismaðurin nøgdur við innstillingina, ella kallaði landsstýrismaðurin setanarbólkin til fundar í juli at umrøða innstillingina til stjórastarvið í Vinnuháskúlanum. Um so var, hvørja støðu hevði setanarbólkurin til framdu innstillingina?

8. Hevði landsstýrismaðurin nakrar relatiónir til stjórastarvið og /ella Vinnuháskúlan, sum orsakaðu úrslitið av setanini og/ella at setanin varð toygd meira enn vanligt?

9. Tá umsøkjari til stjórastarv í almennum stovni hevur verið í starvinum í 8 ár, er tað ikki at rokna sum uppsøgn og ónøgd við viðkomandi persón, tá viðkomandi ikki verður settur aftur í starvið? Vísandi til fyrru spurningar, hvussu grundgevur landsstýrismaðurin so fyri sínari avgerð?

Viðmerkingar:
Farnu 8 árini hava maritimu útbúgvingarnar verið mentar og støðugt tillagaðar til krøvini, sum vinnan setir. Staðfest er, at útbúgvingarnar lúka allar treytir, eru í frábera góðum samljóði við væntanirnar hjá teimum lesandi og vinnuni og eisini í øllum lutum verða mettar at geva fullan altjóða førleika.

Í hesum tíðarskeiði hevur Vinnuháskúlin verið stjórnaður av stjóra, sum hevur fylgt ásetingunum, tillagingum og játtanum, sum Mentamálaráðið hevur sett út í kortið. Arbeiði, sum hevur kravt hepna hond, visiónir og framskygni í gerandisdegnum, har nógvar tillagingar eru framdar, sum eisini hava orsakað truplar avgerðir, eisini á starvsfólkaøkinum.

Stjórin, sum hevur hægstu nautisku útbúgving, drúgvar leiðsluroyndir í vinnuni, hevur námsfrøðiligt innleiðsluprógv, undirvísingarroyndir, hevur luttikið í ótali í viðkomandi leiðsluskeiðum og sum farnu árini í samstarvi við sín arbeiðsgevara, Mentamálaráðið, í næstum fer at lúka Masterútbúgving í leiðslu (MBA), var millum umsøkjararnar til stjórastarvið, nú tað var lýst leyst í vár.

Vísandi til arbeiðsførleikan hjá stjóranum farnu árini, avrikini, førleikarnar at taka truplar avgerðir og menningina av Vinnuháskúlanum á sama tíðarbili, saman við jaliga samstarvinum við Mentamálaráðið, var væntandi, at landsstýrismaðurin fór at seta verandi stjóra í starvið. Men so varð ikki, hóast at landsstýrismaðurin fekk innstilling frá setanarbólki, sum í juni 2012 innstillaði verandi stjóra sum nummar 1.

Samanumtikið hevur verandi stjóri lúkað allar ásetingarnar í stjórastarvinum, sum honum vóru álagdar eins og Vinnuháskúlin hevur ment seg nógv farnu árini. Annað, sum eisini hevur stóran týdning er, at Vinnuháskúlin í nevnda tíðarskeiði ár undan ári hevur megnað at hildið tær játtanir, sum Løgtingið hevur lutað skúlanum, samstundis sum Vinnuháskúlin, hóast stóran næmingavøkstur, er tann útbúgvingarstovnur, sum hevur havt tann minsta vøksturin í rakstrarútreiðslum, samanborið við aðrar útbúgvingarstovnar í Føroyum, sí niðanfyri.

Tað er tí undrarnarsamt, at landstýrismaðurin hevur valt ikki at seta verandi stjóra í framhaldandi starv á Vinnuháskúlanum, men ístaðin mestum hevur valt at siga viðkomandi persóni úr starvi.

Spurningurin er tí, hvat motiverar støðuna hjá landsstýrismanninum? Tí verða settir landsstýrismanninum omanfyrinevndu spurningar.

Hjálagt eru talvur sum lýsa næmingatøl og peninganýtsluna hjá Vinnuháskúlanum seinastu árini - trýst her.

Á Løgtingið 31. juli 2012
Bjarni Djurholm