Men tað verður ikki gjørt við at leggja fleiri avgjøld á vinnuna og slett ikki við framleiðslugjaldi og útflutningstolli, sum nú verður tosað um.
Støðan er, at alt fleiri fara undir FAS, og vit hava eitt vaksandi tal av handverkarum í útlendskari vinnu. Alt gott um tað. Men tað skerst ikki burtur, at samlaði skatturin endar á alsamt færri herðum, so tey, ið eru eftir, skjótt ikki knógva undir byrðuni.
Samstundis verða alt fleiri uppgávur lagdar at gjalda um skattin.

Úrslitið er, at tað skal ein gjøgnumgangandi bygnaðarbroyting til, fyri at minka um tær alt ov stóru útreiðslurnar, sum landskassin dregist við.
Eg legði eitt vinnuskapandi uppskot fyri samgongufund, sum hevði til endamáls at veita teimum borgarum ein skattalætta, sum fóru undir at bjálva og umvæla egnan bústað.

Vit hava skipanina við bjálvingarstuðuli til pensjónistar, og skal hon sjálvandi vera galdandi.
Uppskot mítt var, at hetta skuldi vera ein skipan, sum var galdandi fyri fólk, sum skuldu bjálva ella umvæla síni hús, sum so gav teimum rætt til frádrátt í skattinum. Talan skuldi verði um ein skattafrádrátt  upp á til dømis 35% av umvælingini. Hetta hevði skapt arbeiði til handverkaravinnuna, ið er sera illa fyri. Fyri tað fyrsta fáa vit handverkarar aftur í arbeiði, samstundis fer umsetningurin hjá handilsvinnuni upp, og landið fær eina hægri mvg inntøku.                                                                                  

Henda skipan átti at komi í gildið 1. Januar 2010 og verði galdandi  2 ár fram.
Føroyar skulu minka CO2 útlátið við í minsta lagi 20% fram til 2020, minni upphiting og harvið minni CO2 útlát.

Undirtøka fekst ikki fyri hesum ítøkiliga uppskoti, sum annars kundi verið við til at sett nakað av ferð aftur á byggivinnuna. Talan hevði ikki verið um stórar útlendskar byggimeistarar, ið struku avstað við arbeiðinum, tí talan er um privat hús, har føroyskir handverkarar kundu fingið nakað til hendurnar aftur.

Eitt er vist, og tað er, at vinnulívið á sjógvi og landi mugu skapast fortreytir, so vit kunnu framleiða okkum burtur úr hesum aldudali, vit nú eru í. Hetta ítøkiliga uppskotið hevði verið eitt stórt stig á leiðini til arbeiðsskapandi tiltøk til tann føroyska handverkaran.

Heðin  Zachariassen løgtingslimur fyri fólkaflokkin