Annika Olsen, landsstýriskvinna í innlendismálum, hevur reist málið á landsstýrisfundi, um at fáa kapping í lag á økinum, soleiðis at asfaltering (asfaltsálegging) eisini verða boðin út til privat virki, tá verkætlanir innan íløgur í landsvegir skulu gerast.

- Landsstýrið hevur tikið undir við málinum, og verður hetta framt við fyrsta høvi. Tað eru í løtuni tvey privat feløg í Føroyum, sum asfaltera og gera tað arbeiði sum hartil hoyrir. Tey hava at kalla alla asfaltering hjá kommununum, sum vísir at privatu fyritøkurnar eru kappingarførar.

- Ein størri marknaður kann sum frá líður merkja, at fleiri fyritøkur koma inn á marknaðin. Ein virkin kapping fer at merkja at kostnaðurin fyri vegagerð lækkar, og at samfelagsliga tilfeingisnýtslan verður betri, til gagns fyri fyritøkur og brúkarar, sigur Annika Olsen.