Bjarni Djurholm hevur sett Jacob Vestergaard, landsstýrismanni í fiskivinnumálum soljóðandi fyrispurning:

Fyrispurningur eftir Tingskipanini § 52a.

Fyrispurningur um brúksskyldu og endurskoðan av fiskivinnupolitikinum,
settur Jacob Vestergaard, landsstýrismanni, (at svara skrivliga eftir TS § 52a)

1) Hvussu gongur við arbeiðinum viðvíkjandi brúksskylduni til fiskirættindi, og nær er arbeiðið tøkt til politiska viðgerð?

2) Hvussu langt er arbeiðið komið at endurskoða fiskivinnupolitikkin, og væntar landsstýrismaðurin, at grundarlagið fyri endurskoðaðari lóg er tøkt í august 2010?

Viðmerkingar:
Í álitinum til lógaruppskotið um vinnuligan fiskiskap í august frá meirlutanum í Vinnunevndini er staðfest, at landsstýrismaðurin í fiskivinnumálum hevur sett arbeiði í gongd um, hvør skipan er hóskilig, tá ræður um brúksskyldu til fiskirættindi, og skuldi uppskotið vera liðugt 1. november 2009.

Meirlutin vísti á, at fiskidagaskipanin, m.a. orsakað av tillagingum og broytingum, ikki hevur neyðuga gjøgnumskygnið og til fulnar livir upp til ætlaða endamálið, og at tað er neyðugt at enduskoða fiskidagaskipanina.
 
M.a. vísandi til hesi viðurskifti, skeyt meirilutin upp, at landsstýrimaðurin skjótast eigur at orða nýggjan fiskivinnupolitikk, so grundarlagið undir endurskoðaðari lóg um vinnuligan fiskiskap er tøkt, tá Løgtingið í august 2010 skal áseta fiskidagar fyri árið 2010-2011.

Á Løgtingi, tann 4. desember 2009

Bjarni Djurholm