Talan er um tríggjar væleydnaðar reformar, pensjónsreformin, sjúkratrygging og vegurin aftur frá fyritíðarpensjón

Í Svøríki vóru tríggjar pensjónir, ein almenn, ið er taldi 74%, ein avtalupensjón, sum er ein avtala millum arbeiðsgevarar og fakfeløg, ið telur 19% og ein privat á 7%.

Gamla skipanin kom í gildi í 1960 og bygdi á viðurskiftini, ið tá vóru. Men hesi broyttust serliga í 70-unum og 80-unum, tá búskaparvøksturin minkaði og barnatalið hjá familjunum broyttist.

Talan var um eina pay as you go skipan, ið bygdi á óverulig fíggjarlig viðurskifti. Og tá komið var fram til 2015 fór skipanin ikki at virka meira.

Teir fýra borgarligu flokkarnir saman við javnaðarflokkinum standa aftan fyri nýggju skipanina, og tað er meiri enn 80% av svenska Ríkisdegnum.

Nýggja pensjónsskipanin verður fíggjað uttan fyri svensku fíggjarlógina. 18,5% verður fíggjað umvegis lønina, tó bert upp til eina inntøku á 30.000 svenskum krónum. Harav fara 2,5% til ein pensjónsfond.

16% fíggja inntøkupensjón.

Støddin á pensjónini kemur frá

Øllum lívsinntøkunum

Fíggjarligu og demagogisku menningini

Nær pensjónin verður tikin út (tó ikki fyrr enn 61 ár)

Úrslitið er heimsins mest støðuga pensjónsskipan.

Ein týðandi broyting var at avtaka sjálvvirkandi fyritíðarpensjónina hjá fólki, tá tey høvdu verið sjúkrameldað í eitt ár. Ein onnur týðandi broyting er, at fólk fáa ikki automatiskt sjúkrapengar, men bert í tann mun tey ikki megna at arbeiða.

Eftir trimum mánaðum sum sjúkrameldað fáa fólk bert sjúkrapening, um tey ikki kunnu gera annað arbeiði á sínum arbeiðsplássi, og eftir hálvum ári verður hetta víðkað til onnur arbeiði í økinum.

Tað ber ikki til at vera sjúkrameldaður í fleiri enn 914 dagar, tá ber ikki til longur at fáa sjúkrapening. Tá verða fólk send til arbeiðsávísningina, ið skal finna arbeiði til fólk, ella at endurbúgva tey.

Áður hevur eingin tíðaravmarking verið á longdini á sjúkrameldanini. Bert tá allir møguleikar eru troyttir, fáa fólk fyritíðarpensjón.

Broytingin hevur skorið sjúkradagarnar niður í helvt, eins og talið á fyritíðarpensjónistum er lækkað við 10%, og hetta hevur merkt eina sparing á 30 milliardir krónur seinastu trý árini frá oktober 2006 til oktober 2009.

Fyrr fyritíðarpensjóneraðust 140 fólk um dagin í Svøríki, meðan talið nú er munandi lægri.

Munurin á at fáa sjúkrapening ella fyritíðarpensjón og at arbeiða er somuleiðis vaksin í Svøríki. Fyrri var lítil og eingin munur á tí, fólk fingu.

Fyritíðarpensjónistar kunnu forvinna upp til 43.000 krónur um árið uttan at tað ávirkar pensjónina, men omanfyri tað verða 50 oyru afturhildin í pensjónini fyri hvørja krónu, ið verður forvunnin.