Sleppi ætlanini um at leggja Teistan á kvøldi

Eftir tann víðagitna fundin, ið SSL skipaði fyri í Skopun, har teir løgdu hugsan sina fram fyri oyggjafólkið um at Teistin skuldi leggjast kl 20 á kvøldi, og Hasfjord sum tekur 12 ferðafólk skuldi setast inn í staðin fyri Teistan, gjørdi eg mær tann ómak at biðja um innlit í hagtølini fyri ferðandi um fjørðin á kvøldi, fyri árið 2018.

Hetta gjørdi eg tí at SSL bar fram sum argument, at hagtølini benda á at tey ferðandi eru so fá um kvøldið, at hetta fór at bera væl til. Teir sum møttir vóru fyri SSL í Skopun hetta kvøldið, høvdu tó ongi hagtøl at leggja fram fyri fundarfólkið.

Eg havi nú fingið útskrift av hesum hagtølunum, og um hesi tølini frá SSL eru eftirfarandi, sær tađ soleiđis út viđ siglingini um Skopunarfjørđ, um Hasfjord verđur at sigla túrarnar um kvøldiđ:
Túrin kl 20.40 er Hasfjord ov lítil 358 dagar árliga.
Túrin kl 21.20 er Hasfjord ov lítil 339 dagar árliga.
Túrin kl 22.30 er Hasfjord ov lítil 207 dagar árliga.
Túrin kl 23.05 er Hasfjord ov lítil 157 dagar árliga.

Um SSL hevur tøl ið vísa nakað annað eru tey vælkomin at leggja tey fram, ella afturvisa hesum tølum, sum eg sjálvur havi roynt at funnið fram til útfrá tilsenda tilfarinum frá SSL.
Hesi tølini eru sera áhugaverd.

M.a kemur tađ onkuntíđ fyri, at um 60 fólk ferđast suđur í Sandoynna kl 23.05 av Gomlurætt, og onkuntíđ kemur fyri at um 200 fólk ferđast úr oynni kl 20.40.
So er spurningurin, hvønn stjórin á SSL man ætla sær at seta at sortera, tá bara 12 fólk skulu sleppa viđ hvørja ferđ?
Tađ er í lagi at siga at vit hava ikki játtan tøka at sigla fyri, og so fara á rætta stađ at biđja um hægri játtan.
Men eg haldi slett yvirhøvur ikki tađ er í lagi at koma í Sandoynna og frambera nakađ sum ikki ber til í veruleikanum, og loypa kvøkk á fólk.

Fólk hava lagt sær líviđ til rættis, soleiđis at m.a teirra arbeiđslív byggir á at Teistin er álitiđ fram til at koyrandi er í oynna.

Trivnaður, ítróttur, mentanarlív, ferðavinna, trúarlív o.m.a er somuleiðis í vanda fyri at detta niðurfyri um SSL velur at halda fast við hesa burtur úr vóni og viti høpisleysu ætlan, at seta eitt skip at sigla um kvøldarnar sum tekur 12 ferðafólk.

Av tí at hetta, nú ein mánaða síðani fundin í Skopun, framvegis er høvuðsevnið millum fólk í Sandoynni, at man er bangin og óttafullur um at møguleikin at ferðast um fjørðin verður munandi skerdur, verður hervið frá mínari síðu alment heitt á SSL ella landsstýrismannin, um beinavegin at upplýsa fyri okkum um man framvegis heldur fast um hesar ætlanir.

Meiningin varð at Hasfjord skuldi koma afturat Teistanum, fyri at lætta um tungu ferðsluna við Teistanum, og økja kapasitetin hjá Teistanum at føra personbilar um fjørðin, men ikki at sigla fyri Teistan.
Tađ verđur ikki góđtikiđ yvirhøvur, at Teistin skal sigla færri túrar, og tað verður heldur ikki góðtikið at sandoyggjafólk skulu liva við hesi óvissuni hangandi yvir høvdinum.
Nú er tíðin komin at tóna reint flagg.
Brandur Sandoy
Tingmaður fyri Fólkaflokkin